Велень Озксось Юрткульсэль


Аволь умок Ульяновской областень Старомайнской райононь Базарно-Мордовский Юрткуль велесэнть ютась покш кенярксчи — эрицятне пурнавкшность Велень Озксов. Тедеде те эрзянь-мокшонь культурань фестивалесь ютавтови уш нилецеде. Эряви меремс, иестэ иес сон пурны седе ламо инжеть, ды касы сонзэ эрявиксчизэ.
Кода содатано, Велень Озксось – эрзянь раськенть покш кенярксчи. Сонзэ историязо саи ушодкс умонь шкатнестэ. Истя, эрзятне пурнавильть вейс ды озныльть Инешкипазонтень ды эсь покштятненень-бабатненень: вешильть сюронь чачома, ракшатнень ванстома, конатнень эйстэ аштесь ломантнень паро эрямост. Покштятненень-бабатненень озномадо башка, Раськень Озкссонть эрзятне толковасть талновтыця кевкстематнень ды арсесть эсь этносонть касомань-кепетемань лувонть. Неень шкане Велень Озксось – те аволь ансяк покштятненень-бабатненень пшкадема, истя жо эсь малавикстнэнь, оятнень, содавикстнэнь марто вастовома. Кенярксчив сыть сеть, кие велесэнть зярдо-бути эрясь, тонавтнесь, кинь тесэ ютасть эйкакш пингезэ ды од поразо.
Истямо лувсо ютась Базарно-Мордовский Юрткуль велень кенярксчиськак. Велень Озксов пурнавсть аволь ансяк велень, весе райононь эрицятне. Ламо инжеть сакшность лия оштнестэ ды регионтнэстэ. Покш инжетнень ютксо ульнесть Старомайнской райононь администрациянь прявтонь васень полавтыцясь В.И.Павлов, «Матвеевское сельское поселение» муниципальной образованиянь администрациянь прявтось В.М.Комиссаров, Матвеевское велень прявтось Н.В.Краюхина, Равчирень финнэнь-угрань раськетнень культурань кужонь прявтонь полавтыцясь О.О.Кулаева ды лият.
Старомайнской райононь администрациянь прявтонь васенце полавтыцясь Валерий Иванович Павлов мероприятиянть панжомсто тешкстызе кенярксчинть пек покш эрявиксчинзэ.
– Эрзятне ды мокшотне – те раське, кона вансты эсь ундокстнэнь, койтнень-кирдатнень, кона эри сэтьместэ ды ояксчисэ лия раськетнень марто. Мон ламо иеть эрян Старомайнской райононь моданть лангсо, минек тесэ улить рузт, татарт, мокшот, эрзят ды лия раськетькак, ды вестькак арасельть кодаткак сёвномань тевть. Сынь свал эрить ояксчисэ, – тешкстызе Валерий Иванович.
Теде мейле Валерий Павлов тешкстынзе сеть эрицятнень, конат эсь эрьвачинь тевсэст лездыть велентень. Ютксост почтальонт, электрикть, медпунктонь ды Культурань кудонь важодицят... Сыненст максовсть Благодарностть ды питней казнеть.
Мордовия Республикань Прявтонть, Национальной политикань коряс министерстванть, эрзянь-мокшонь раськень Регионъютконь вейсэндявксонть ды Равчирень финнэнь-угрань раськетнень культурань куншкакуронть пельде Раськень Озксов пурнавозтненень поздоровт ёвтась Равчирень финнэнь-угрань раськетнень культурань куншкакуронь прявтонь полавтыцясь О.О.Кулаева.
– Ютазь иестэнть минь содавтынек малав 40 регионт, косо эрить эрзят ды мокшот. Сестэ минь эштё эзинек содаяк, ули истямо веле – Базарно-Мордовский Юрткуль, косо эрить истят паро ломанть. Тынь эсь вийсэ вансттадо покштянк-бабанк койтнень-кирдатнень, эсь раськеденть ёвтнетядо эйкакштненень. Кемеви, тынь икелепелевгак тень весементь ванстсынк, – мерсь Ольга Осиповна.
Седе тов поздоровтнень ды лембе валтнэнь поладызь тиринь кельсэ моротне, конат пек кенярдовтызь пурнавозтнень ды кепедизь мелест.
Ю.Еремина

JPG Файл - ОМВД Республики Мордовия ММО МВД России «Темниковский» устанавливается местонахождение Киселева Эдуарда Алексеевича, 1970 года рождения, который с 1 марта текущего года не выходит на связь с родственниками.
ОМВД Республики Мордовия
В Мордовии отметили День кукольника Артисты Театра кукол Мордовии отметили свой профессиональный праздник – Международный день кукольника.
Газета Мордовия